黃長發早前新聞不斷，不過現時他已投入新工作，正式與娛樂圈劃清界線。日前，他於中環一間咖啡店的開幕禮中現身，此店由其好友Christine投資，二人不時在店內招呼來賓、好友，就連長發的大哥都有到場為他撐場。
長發正式投入新工作，在咖啡店任職助理經理，不時都要負責跟客訂貨及傾價錢，為學得更多，他更親自學沖咖啡。長發謂：「我哋呢間舖頭嘅師傅專登由法國請返嚟，侍應都係由外國返嚟居多，就算menu都係用法文設計，除咗早餐、午餐外，夜晚更會做open bar。」
坦言冇投資
長發坦言他沒有投資於此店上，不過若然生意好，都會有股份，老闆亦有意開其他分店，屆時第二間分店就會由他來管理。雖然長發與老闆Christine之前有不少新聞，但他說：「今日係第一日返工，自己正式脫離呢一行（娛樂圈），就算啲雜誌嚟影都冇所謂，我都唔會再入娛樂圈，我只希望做番自己。」
法文易溝通
今次做咖啡店，長發稱沒有告知父母，因為怕兩老會擔心，反而有向兩位哥哥傾訴，而長興更戥他開心，並予以鼓勵，認為打工最緊要跟老闆、員工相處愉快。長發說：「係呀，公司全部人都係用法文溝通，我會容易表達自己，（不是幫哥哥長興開時裝店嗎？）未開住，如果阿哥將來開，我一定會幫手。」
文：影視祖