據元泰憶述，當年跟于占元赴美落難時，師兄弟無不對前景感到徬徨無助，他說：「當時我哋廿幾人選擇留低喺美國，暫時寄住喺當地朋友嘅apartment度，為咗生活，我哋有氣有力嘅，個個都出去搵食。」

遷居海邊‧靠水吃水

黑頭髮、黑眼睛、黃皮膚，要在一個紅鬚綠眼的國度裏謀生，少不免遭人欺負、剝削，元泰說：「初初喺羅省打工，呢個禮拜搵嘅錢，下個禮拜就冇晒，後來我轉去德州諗住換吓環境，有次行到去一個海邊，見到個海一望無際，海面好靚，海入面仲有好多魚游來游去，我就問老婆，不如搬去海邊住咯！搬咗去海邊住之後，我又諗可以試吓搞間餐館，於是拎咗幾萬元積蓄，用咗廿幾日時間籌備，就咁開咗第一間餐館。」

靠山吃山，靠水吃水，是中國人自古以來的處世哲學，元泰說：「估唔到餐館生意唔錯，78、79年間，開咗成五、六間分店，依家諗番轉頭，當初我拎起魚叉、魚網，加幾包米，搞間餐館，只不過想等啲外國人試吓Chinese seafood，估唔到一做三十年，依家做到喺美國、加拿大都有分店，叫做不過不失啦！」

雖然元泰從事飲食生意，似與于占元所教的風馬牛不相及，但于師傅不是常說「師傅領進門，修行在個人」嗎？正如美國作家艾各特說：「真正的老師會提防他的學生太受他本人的影響。」在京劇行頭愈來愈窄的今天，更見于占元當年的先見之明。

下廚謝師‧苦無機會

元泰說：「可能我哋細個跟師傅學嘢，啲伙食太差，只有出到外地表演，至有機會叫做食得好啲，我做餐廳係抱住過得自己過得人嘅宗旨去做，當年師母都有嚟過我間餐館捧場，每次我都親手煮嘢畀佢食，我都好想親手煮一餐畀師傅食，可惜始終冇機會。」

（四十七）