陳偉霆（William）在新歌ＭＶ中與師妹詩雅親熱地又攬又抱，甜蜜得猶如一對戀人，兩人更大鬥演技，詩雅不惜瞓身演出，William就使出一招歇斯底里，嚇親街坊。
William日前為新歌《今天終於知道錯》拍攝ＭＶ，詩雅在ＭＶ中飾演模特兒，兩人因誤會分手，詩雅更遇上車禍失憶，William帶詩雅到攝影室舊地重遊，導演要兩人親暱地又攬又抱，兩人溫馨地玩自拍，又親熱共舞，不過兩個百厭星鏡頭後就不停爆肚，整古弄怪引對方發笑，兩人邊情深對望，詩雅卻邊笑說：「你有暗瘡。」William就回敬她：「你對眼太大好似想跌出嚟。」令工作人員捧腹大笑。
話喊就喊
兩人在鏡頭前恍如熱戀中情侶，更大鬥演技，導演要詩雅回憶感動一幕而落淚，她不消兩分鐘即淚流滿臉，一take搞掂，William也拍掌激讚。而另一幕William看到詩雅車禍倒地，他投入得在街上歇斯底里大叫，嚇得街坊拔腿就跑，不過最搞笑他發瘋跑向瞓在街頭的詩雅時，他衝力太大，將詩雅推到反轉，搖醒詩雅時卻似想捏死她，連詩雅都忍不住大笑。
黑過墨汁
另外，前晚William出席胡敏珊生日會，對緋聞女友Angelababy與周秀娜不和，他說：「我唔信係事實，希望出面嘅model團結啲，依家分裂得好犀利，絕對唔信Baby咁冇禮貌。」而昨日他一臉病容到電台訪問，他說：「可能拍廣告天氣太翳焗，昨日黑過墨汁，形象指導幫我搞掂後離開時發生交通意外，助手又被蜜蜂針到入急症室，我仲踢爆攝影師鏡頭，真係好黑。」
文：音樂組