何守信在埃塞俄比亞拍攝台慶特輯時發生差錯腳意外引致骨折，傷勢嚴重，昨日他飛撲回港並即時入院接受治療，餘下多日的肯尼亞行程，由同行的宣萱頂上，下星期生日的她要在當地過生日。
何B、宣萱早前出發到埃塞俄比亞拍攝台慶特輯《活着》，拍了約七日，何B在Turmi拍攝期間差錯腳引致骨折，因當地的醫療設備不足，通訊網絡不完善，同行的工作人員以電郵與公司取得聯絡，決定將何B送返港醫治。
落後小鎮冇輪椅
昨午六時許，右腳足踝骨折的何B在外籍保險醫護人員陪同下坐輪椅抵港，即前往法國醫院就醫。右腳打了石膏的他精神不俗，接受訪問時說：「都係自己唔小心，睇漏眼差錯腳落一個三呎深嘅坑渠，搽咗藥油都唔消腫，跟住坐咗五個鐘頭車去到一個小鎮嘅醫院，嗰度都好落後，冇輪椅，但有X光，醫生話要轉去首都醫院。」
當時何B見了兩個醫生，一個較有經驗的醫生指他骨折嚴重，要盡快動手術，否則瘀血會影響腳部，何B說：「我隻腳根本唔行得，痛到食咗兩排止痛藥都瞓唔到。」
有關何B的傷勢，監製鄧婉媚表示：「醫生已經睇過佢嘅傷勢，聽朝七點半會做手術。何B腳踭有兩條骨仔斷咗、骹都歪埋，亦都驚有部分皮膚壞死咗，不過詳情要等做咗手術先知。手術後佢要留院，醫生預計佢要休息兩、三個月先至可以痊愈。何B依家隻腳絕對唔可以掂地，好彩佢喺非洲醫院已經打咗石膏，所以冇移位情況。佢嘅家人今晚都唔會走，何B叫我代佢多謝大家關心。」
宣萱捱義氣頂上
何B妻子陳麗斯昨晚已在醫院等候，她說日前已得知老公受傷，因不知其受傷程度，甚捱得痛的他，在電話中可聽出他很辛苦，所以都很擔心，恐怕何B傷筋，倘不及早治理會有後遺症，幸他常做運動，但之後一定要好好休息。
至於餘下在肯尼亞的拍攝工作，將由宣萱頂上，監製鄧婉媚指宣萱的個人藥物及衣衫都不足夠，但本周出發到肯尼亞的徐子珊會帶補給品給宣萱。宣萱的經理人則說，宣萱有食開胃藥，去肯尼亞又沒有食防瘧疾藥，相信監製會作安排。本月18日生日的宣萱，相信要留在肯尼亞過生日了！
文：影視組