曾志偉昨日在銅鑼灣出席月餅宣傳活動，他擔任代言人已十三年，與廣告商已是「講心唔講金」的關係，他笑說：「呢幾年我都有問佢哋，使唔使畀番啲你哋呀，依家周圍見到我哋嘅廣告，好似佢幫緊我做宣傳咁。」
白韻琴日前出席無綫活動時彈其節目質素差，更指藝人上《獎門人》節目要食Wasabi及被他戲弄如同白癡，志偉寸白姐姐「過時」：「佢好少睇節目喇，時代進步咗都唔知，TVB唔少環節都喺全世界搜羅番嚟，係最潮流嘅嘢，觀眾睇得開心咪得囉，Wasabi都已經係十年前嘅嘢，仲攞嚟講。」
有傳黃秋生前晚出席首映時轟無綫招待不周，自言淪為「大茄」憤而離場，志偉笑說：「現場有人招待呀。佢講過話冇位，我問佢係咪發脾氣？佢話唔係呀，約咗人趕住走，佢搵藉口走啫。佢不嬲都係大茄啦，幾時有做過主角呀，角色最好係佢啦，咁多港姐攬。」