前晚，黃秋生、吳鎮宇及謝天華等主演的《LAUGHING GOR之節》舉行首映，吸引近百藝人出席。主角黃秋生以白馬王子造型現身，與呂慧儀、周美欣十指緊扣行紅地氈，不時攬着兩女纖腰，認真好艷福，搶晒謝天華風頭。秋生還大讚周美欣是亞洲美人、呂慧儀是美人魚。談到戲中親熱戲，他形容「講起都標汗、諗起都開心」，全程保持興奮狀態入場。

曾與秋生傳緋聞的張詩敏（左）鬼祟現身。	《LAUGHING GOR之變節》首映，一班主角齊捧場。	吳鎮宇自言這一身打扮是低調的奢華。

企咗好耐戇居居

可惜事隔十數分鐘後，他從影院氣沖沖而出，怒轟大會說：「身為主要演員都無座位，直情變咗『大茄』。（你好嬲？）你睇我個樣唔嬲咩？喺入面企咗好耐，戇居居咁。（同陳志雲反映？）反咩映啫，唔識搞唔好搞啦。」隨即火爆離場，令人為之側目。但外事部副總監曾醒明卻強調一定有留位。

佘詩曼與歐陽震華新片先睹為快。	秋生冇位坐，被氣得火爆離場。	楊思琦及一眾女藝員性感撐場。

事後記者再聯絡秋生，他說：「唔單止我冇位坐，好多贊助商代表都冇，公關又唔敢叫人起身，有啲成行冇人坐又話留咗畀人，都唔知搞咩，仲叫我坐第一行，曾志偉就肯坐。電影唔同電視，搞法唔同，邵氏好耐無開戲，我都希望搞得好好睇睇，希望無綫可以吸取呢次經驗。」

秋生說無綫高層樂易玲事後亦有致電給他：「佢同我講唔好意思，可能員工經驗淺，待慢咗，希望約我再入戲院睇番部戲。」但秋生指將到內地工作四個月，惟有等睇影碟，他說：「希望到時有人識得送一隻畀我啦。」

緋聞女友暗撐場

另外，曾與秋生傳緋聞的模特兒張詩敏（Jessie）與女友人鬼祟撐場，全程與秋生沒有交流，事後聯絡同行女友人（星城娛樂公司人員），她表示Jessie與秋生是好朋友而捧場。

同場的吳鎮宇一身causal打扮出席，風頭和行頭不及秋生。吳鎮宇說：「我對波鞋貴過佢全身。我係低調嘅奢華，佢係高調嘅庸俗，品味係用錢買唔到嘅。」身為主角的謝天華與太太結伴到場，笑言同秋生一黑一白配襯很夾。

記者事後再致電樂易玲，她說：「秋生同我講要走，因為有啲嘢做。由於好多人嚟撐場，我忙於招呼唔知情況。其實大會有安排VIP同演員位，可能帶位嘅員工未即時安排，秋生又以為冇安排咁就走咗，可能佢個樣惡啲，大家就以為佢嬲啫。」

文：影視組