樂壇小天后泳兒昨日為新碟舉行簽唱會，向來形象健康的她，對於日本著名藝人酒井法子被懷疑吸毒表示可惜之餘，更透露曾聽聞有藝人為減壓染上毒癮，未有受引誘的泳兒又教大家應以健康方法紓壓。
泳兒昨日舉行《多一點 泳兒 vincy》新碟簽唱會，除小師弟鄭家維現身捧場外，fans更出心出力打氣，準備心意禮物和大合唱冧偶像，氹得泳兒笑逐顏開。
樹立壞榜樣
對於日本著名藝人酒井法子被懷疑吸毒一事，泳兒表示雖然不是法子的fans，但亦有留意報道，她說：「知佢喺日本係知名藝人，都覺得好可惜。（身為媽媽吸毒？）如果係真，的確係一個唔好嘅榜樣；我知道藝人壓力大，但都唔可以用呢啲作為發洩方法！」
泳兒更大爆曾聽聞圈中有人吸毒減壓，她說：「藝人可能唔可以好似平常人咁得閒行吓街減壓，但都可以用啲健康嘅方法，好似做運動咁，吸毒除咗傷害自己身體，亦會令屋企人同fans擔心。」泳兒表示自己最近就愛上泰拳，可向沙包發洩。
非禮冇得驚
最近頻頻有女藝人出席公開場合時懷疑被非禮，與fans大玩零距離遊戲的泳兒，坦言不會因此剝削男fans玩遊戲的權利：「冇得驚，玩遊戲要投入，反而會留意着衫方面，多人嘅活動會着多布啲，少布留番喺台上跳舞嗰陣啦！」而人手保護方面，泳兒就表示有加強保安人員，亦會信任身邊同事：「相信有咩事同事、工作人員會救我，其實作為藝人好難避免，自己要有危機意識，見到可疑人先提高警覺。」
採訪：音樂組