正所謂三歲定八十，或許用七小福年代的一件往事，大家可更了解原名張轉男的元秋是甚麼樣的人。

當年七小福都是從文蔚樓乘搭巴士到荔園登台表演，于占元師傅為免有徒弟走失，每次出發前都會委派元秋負責點人數，人齊才會出發。可是有一次，元秋反覆點算，發現少了一個人。

不堪捱苦‧元香上吊

不知所終的，是有「中國戲劇學院校花」美譽的元香，元秋心中極是焦急，即時把失蹤人口上報師傅，元秋憶述道：「師傅叫我返上樓睇吓咩事，點知一轉彎，就見到我哋用嚟練引體上升嗰條鐵架，上面吊住元香，佢當時就快窒息，眼同脷都凸晒出嚟，嚇到我即刻衝上前抱佢落嚟，我係咁搖佢，睇吓元香有冇知覺，好彩佢冇事咋，幾驚呀！佢仲好多謝我咁話：『三姐多謝你救番我』！」

為救元香，元秋連腰部撞瘀了亦懵然不知，也幸好她奮不顧身，勇救了一條寶貴性命，其俠女性格從小已表露無遺。元秋性格爽直，直腸直肚，她說元香大難不死，果有後福，早知自己也走去吊頸可也。

大難不死‧果有後福

元秋說：「我後來問番元香，原來佢因為頂唔順要日練夜練，又畀師傅一日鬧到黑，所以先會選擇輕生，不過自此之後，元香就得到師傅特別對待，不但冇再受打罵，更可以唔使練功，只要專心學好花旦就OK，早知係咁，我都走去吊頸好過，可惜我冇勇氣。其實元香真係幾靚女，所以師傅偏心佢啦！」

可能元秋的父親早知女兒天性如此，喜歡鋤強扶弱，所以為愛女改名「轉男」，的確，從一九五七年跟于師傅習武起，元秋的性格從沒改變，兩年後中國戲劇學院成立，元秋成為三師姐，一直本着「人不犯我，我不犯人」為宗旨，敢怒敢言，令她成為性格最鮮明的七小福之一。（四十一）