蔡卓妍（阿Sa）出席動漫節活動時，笑言不及o靚模的條件推出人形攬枕，但她不心急嫁人，更否認有緋聞男友鄭中基的父親提親一事；她又戥好姊妹鍾欣桐（阿嬌）出個人碟開心，不過她深信Twins不會拆夥，更熱切期待Twins「復合」一日。
阿Sa昨日現身動漫節，試玩全球首部「可口可樂神奇凝冰」汽水機，談及o靚模熱潮大盛，推出人形攬枕成為熱話，但身為「潮流達人」的阿Sa卻無意模仿，她無奈說：「我『老』啦，已經26歲，呢啲係25歲以下推出，我過咗呢個級別。」但阿Sa沒有因為「大個女」而急於嫁人，對於有報道指緋聞男友鄭中基的父親向其父提親一事，阿Sa沒好氣說：「佢哋只係有生意來往，35歲後我先考慮結婚。」有說鄭中基年紀不輕可能好心急，阿Sa懶理話：「等吓先，我大把時間。」
籲o靚模要增值
有謂o靚模賣弄性感有教壞細路之嫌，阿Sa就覺得o靚模此舉都是工作需要，不過她寄語o靚模要增值自己，因娛樂圈是長線發展，她說：「唔可以長期做死一樣。」正如她入行10年來都不停學習，唱歌、拍戲及學與人溝通。
支持阿嬌出碟
至於阿嬌年底出單飛唱片，阿Sa急澄清：「Twins唔係拆夥，阿嬌只係用自己個名出碟，我會幫佢買十張碟作支持，我都準備出第二張個人碟。」阿Sa又為阿嬌可作歌、影及舞台劇多線發展感開心，她點頭默認阿嬌有份演出《越光寶盒》。問阿Sa可恨和阿嬌以Twins身份演出，她直言：「好想，我最想可以喺Twins十周年時一齊演出。」
採訪：音樂組