成龍原名陳港生，族名房仕龍，據說是唐朝名相房玄齡之後。七小福年代，于占元師傅替他取名元樓，當大師兄洪金寶滿師後，棄用元龍之名，成龍則人棄我取，接收元龍之名大展拳腳。

打滾數年‧曾扮死屍

成龍說：「出嚟拍戲我就用元龍呢個名，我見洪金寶唔用，我咪用囉，嗰時我仲後生，元奎跟徐小明就做副指導，元彪又發展得好過我，我亦都有拍過《女警察》同《頂天立地》，不過主角唔係我。」

當時成龍一直在邵氏擔任跑龍套的角色，不久李小龍猝逝，武打片票房受嚴重打擊而減產，他的事業遇上了第一道難關。

成龍憶述道：「喺影圈打滾好幾年，從死屍、小武師、到主角，再做番武師，然後又做指導，我對電影愈來愈冇興趣，咁就返澳洲休息吓。有一日，我收到導演羅維電報話叫我返去拍《新精武門》，我就係因為呢套戲而改名。」

返港後，羅維覺得元龍這個藝名不好聽，即問成龍想取個甚麼的名字，智囊團費煞思量之下，仍無法取得共識，一直在多個名字中僵持不下。

成龍說：「小龍死咗個名唔吉利，大龍完全唔好聽，我鍾意趙子龍，不過佢哋話子龍代表好細，又話唔好，我又鍾意雲龍，佢哋就話神龍見首不見尾，後來有人叫我用成龍呢個名，我心諗成蟲就有我份，初時都唔夠膽用呢個名，不過冇得揀。」

蛇形刁手‧由蟲變龍

成龍改名後，差點「從心所願」變成蟲，像沾上黑氣一樣，一直沒運行，成龍說：「改咗呢個名後，一啲都唔旺，戲冇人睇，票房唔好，真係好灰，我講過畀自己兩年時間，如果真係撈唔掂就返澳洲，朋友就畀十澳幣祝我成功，咁啱得咁蹺，時間過咗兩年，有人搵我拍《蛇形刁手》，劉家良都讚我演得好。呢套戲我身兼主角、副導演、眾人替身等多個崗位，收埋替身錢，開始有運行，至此呢個名一用就三十年，依家先覺得呢個名幾好聽。」 （三十八）