昨日，《四葉草電視電影》一班演員DaDa、陳蕊蕊、李婷、林婉霞、郭穎橋、羅天宇、何浩文和李豪等，在小欖拍攝外景，劇情講DaDa、李婷、陳蕊蕊等為在沙灘集訓的球員打氣。

着三點式尷尬

擁有34E、25、35「波霸」身材的陳蕊蕊雖然屬客串性質，但她以比堅尼top亮相，身材逼爆，期間俯身掃腳上的沙時，更不經意「倒奶」，將兩位身材平平的女主角DaDa和李婷比下去，搶盡風頭。問到陳蕊蕊可覺得喧賓奪主搶了兩位女主角鏡？她說：「唔會，着泳衣係劇情需要，服飾都係公司安排，自己平日都好少着三點式，因為畀人望好尷尬。」

約食飯冇問題

最近DaDa傳與羅天宇「撻着」，兩人齊聲否認，DaDa被問到會否與羅天宇繼續約會？她說：「我哋班人成日都一齊食飯㗎啦，就算兩個人都冇問題，大家係朋友。」問到她有冇覺得被陳蕊蕊搶風頭？她說：「唔會，唔會比較呢啲嘢，都係睇劇情需要。」雖然發生鄭融被非禮事件，明日將出席動漫展活動的DaDa並不擔心，她說：「好多fans都識嘅，如果見到生面口都會留意啲。」

而劇中飾演隊醫的李婷表示：「有次要幫李豪治理腳傷，佢咁啱踢完波，隻腳又多汗又臭，拍完場戲搞到我成手老泥，好核突，即刻去洗咗幾次手，同埋用消毒藥水消毒。」

採訪：影視組