o靚界女神Angelababy為慶祝寫真集大賣，前晚自掏腰包豪請工作人員到灣仔Nino's Cozinha葡國餐廳晚膳。問她預算多少錢埋單？她豪氣表示任由大家點菜：「我諗唔使五位數，近五位啦，如果佢哋食得到五位數都冇問題。」

推出寫真精裝版

提到早前緋聞男友陳偉霆為撐baby夠高行騷，向吳彥祖謊稱：「佢高過你。」對此baby甜笑說：「我有睇報道，睇完都搔頭，我有打畀佢，佢話只係講吓笑。（佢咁撐你，係咪好冧？）我都好撐佢，我睇完覺得好搞笑，我知佢好多方面都好撐我。」

另外，baby透露寫真首二萬本已售罄，第二版的一萬本，巿面還有小量現貨，她有意稍後推出精裝版，內附製作花絮DVD。她稱有拍賣網將其簽名寫真炒至四百多元，問她會否不喜歡fans將寫真集拿來炒賣？她坦言：「唔會，佢有權利咁做，佢仲將我同佢嘅合照放上網，我記得幫佢簽咗兩本，佢只係攞咗一本出嚟賣啫。」

非禮事件撐o靚模

對於成為寫真集銷量No1，baby謙稱只是數字遊戲，最重要是口碑，至於篤數問題，她謂數字全由發行商提供。有指因o靚模寫真氾濫而引致鄭融被非禮事件，她不認同說：「我覺得唔會，如果係真，啲人不如非禮o靚模。（你自己擔唔擔心？）我唔係成日都着得性感，而且我向來小心，上次書展公司都派咗兩名保安保護我。」

問到baby有否遇過癡情fans？她表示所有fans都很保護她，當她一家人，不會有不軌企圖，她說：「有個fans帶住手套同密實袋叫我簽名，佢唔係怕豬流感，而係驚整污糟我本寫真，我真係好感動。」

文：名人組