洪天明與周家蔚這對緋聞情侶，昨日同場行泳衣騷，未知是否寓工作於拍拖，天明雀躍得周圍撩女仔，由小妹妹至無綫女主播皆不放過，又揚言會周圍「哨」睇女仔，難得周家蔚大方力撐：「佢鍾意講女仔，今日冇人陪佢講，係dry啲！」
洪天明、周家蔚、陳爽、周美欣昨日齊出席黃金海岸「黃金夏日游樂園」開幕禮，三女以三點式泳衣行catwalk，吸引大批龍友到場，周美欣則獲妹妹帶同相機及男性友人撐場。
港人比較規律
天明昨日心情大靚，既周圍撩女仔，又捉實周家蔚玉手，期間更出現「火車未到站」，雖然未拉好拉鏈，但天明仍表現風騷說：「我同周家蔚唔係第一次同台，但得我一個男仔有啲dry。（唔開心周家蔚性感？）唔會，依家興，個個都性感。我都有周圍『哨』，眼生出嚟睇好嘢同唔好嘢，佢哋幾個好，我唔好。（有冇睇G模？）未，書展賣書OK，派奶、派雪糕、刷牙就盡量唔好。其實呢類書日本、外國好多，可能香港人比較規律啲，（但陳志雲話G模唔OK，要封殺。）佢有佢嘅意見。」
周家蔚得悉天明揚言睇女，沒有扭他耳仔之餘，更力撐說：「佢鍾意講女仔，今日冇人陪佢講，係dry啲！（唔呷醋？）男仔講呢啲好正常，唔講就可能唔成熟。我係女仔都會睇寫真，欣賞吓人哋body，只要用欣賞角度睇，我覺得冇問題。」
陳爽自認保守
而首次行泳衣catwalk的陳爽說：「有啲緊張，我有節食修身。（怕唔怕龍友鏡頭？）接得個job就預咗，我打晒底。（性感怕唔怕被人話？）天氣熱，好多女仔出街都係背心、短褲，喺外國亦都好普遍，香港要慢慢接受。（會否影雪糕相、刷牙相？）拍劇可以，私底下唔會，我比較保守。」
文：影視組