昨日古巨基、Baby及羽翹分別為新書舉行簽名活動，被兩位美女夾擊的基仔以可愛煲呔造型到場，獲大批歌迷舉牌兼吶喊支持，他更發揮「古Sir」魅力，吸引不少小朋友蜂擁而至，而「o靚界女神」Baby撞到正在基仔旁的攤位搞簽名會，到場時更風騷地向在場排隊支持的二百fans揮手又飛吻，令吶喊聲不絕，氣氛非常熱鬧。曾跟基仔合作的Baby亦禮貌地向對方送上寫真集，基仔則回贈其新書，兩人合照時基仔輕搭Baby的香肩，恨死fans。

基仔的粉絲人多勢眾又熱情，氣勢強勁。

Baby獲外籍保安護送離開會場，盡顯地位。

僅50人撐場

基仔向來表示對o靚模寫真集沒興趣，昨日他說：「呢本係唯一一本，（其他o靚模送嘅唔要？）總之係唯一一本啦！」兩位分別是樂壇及模特兒界的萬人迷惺惺相惜，兩幫粉絲大嗌造勢，相比之下，只有五十人撐場的羽翹顯得非常冷清。

基仔透露印製了一萬二千本的新書《IQ王》前日開始斷市，並將加印推出，他說：「爆到咁真係好開心，但我要公開道歉，好多小朋友去攤位買唔到書，搞到同家長有爭執，下年我要出本《EQ王》，免大家傷和氣。」他又認為o靚模風氣氾濫，少女不應輕易放棄學業。

羽翹的簽名會場地明顯較基仔及Baby冷清。	基仔鬼馬地跟找他簽名的小朋友聊天。	Baby與一貌似她的小fans合照。

拒學周秀娜

此外，寫真集大賣的Baby，透露將推出精裝版，更附有拍攝花絮DVD。問她會否如周秀娜般「送吻」答謝fans？她表示未能接受送吻的回饋行動，至於她為何在街上避見周秀娜，Baby說：「唔係避，因為身邊好多記者，只係唔想搞是非，我好欣賞佢，覺得佢好靚女。」

採訪：音樂組、名人組