陳慧琳（Kelly）於本月10日誕下麟兒，昨午她爸爸陳崇偉、細佬陳司翰、老爺、奶奶及姑奶組成觀「昇」團，一行五人齊齊探望產後的Kelly及萬千寵愛的小劉昇，司翰更踢爆家姐非常緊張，命令各人要洗手及細聲說話。
劉家及陳家組成的觀「昇」團昨日下午一點許先後到達醫院，期間現場的記者衝上前拍攝而阻塞通道，引起輕微混亂，Alex的父母接受訪問時大讚BB好得意，多謝大家關心，改名由Alex負責，而陳爸爸坦言第一次見外孫仔，心情興奮。
陳爸叫追多個女
眾人逗留接近一小時後齊齊離開醫院，陳爸主動向記者表示非常開心，大讚外孫好靚仔，指BB的嘴巴似爸爸，而雙眼同額頭就似足Kelly，身為公公的他亦即時跟外孫合照留念，對於有指Kelly火速復工計劃，陳爸說：「我睇就未得住，Kelly依家谷緊奶，等BB食多啲人奶先，計劃呢啲可以隨時改。」
他又透露湊BB由Kelly及Alex親力親為，坐月員已教曉Kelly「湊B」技巧，而Kelly媽咪就負責煲薑醋，問到他會否鼓勵Kelly追多個？陳爸說：「呢啲要問Kelly，如果係就生女啦，一仔一女好呀。」
抱B要收口洗手
司翰表示贈送外甥BB衫及生日卡，他更踢爆Kelly吩咐家人進入病房時要立刻洗手，他說：「佢大叫我哋洗手，又話我哋講嘢好嘈，叫我哋細聲啲，我冇抱過BB，都係Daddy（陳爸）抱，不過佢抱到硬晒軚咁，（多留香港？）會呀，我都好希望成日同佢一齊玩。」
採訪：音樂組