Kelly昨早剖腹誕下「慈姑椗」的喜訊傳開後，圈中人紛紛送上祝福。阿徐昨日出席SKII活動時即恭祝Kelly，並送「辛苦」兩字給她做「賀禮」，阿徐說：「（BB出世）第一個月一定好辛苦，當年我餵人奶，好以狗仔生BB咁，半步都唔想離開佢，佢抖氣聲大啲都驚佢窒息，成個人好緊張，但依家個女大咗就好Enjoy。」

太緊張產後抑鬱

當年曾有傳阿徐產後有抑鬱症？阿徐就話情況不算嚴重，只是太緊張，故常「煩」住兒科醫生，最慘當時老公陳奕迅（Eason）要為口奔馳，只得她一力承擔，她謂：「我一腳踢，嗰時我同師奶冇乜分別。」阿徐最近簽了熊黛林經理人Kim，她說因近年很多人搵她工作，故請對方幫她傾工作性質及時間，但女兒仍是放在第一位，現時欲發展事業，故暫不考慮再生。

同場的琦琦就讚Kelly好命，祝Kelly三年抱兩，問她可會再生？琦琦就說和老公任達華都偏愛女，貪囡囡可攬可拖手仔夠窩心。

擁有三位子女的劉美君，叮囑Kelly緊記要餵人奶及放鬆緊張心情，她說：「餵人奶係修身好方法，坐低餵一個鐘奶，可以消耗五百卡路里。同時食母乳的BB會特別健康，高大威猛。」

謝安琪高呼偉大

謝安琪接受查小欣訪問時，得知Kelly「生咗」即開心尖叫，她說：「真係好開心，Send SMS畀佢恭喜佢，呢件事好偉大，人生咁多開心事，何必為無聊嘢煩。」謝安琪又話見Kelly懷孕時好靚，就知她是叻媽咪。

文：音樂組