36歲的Kelly初為人母，她一直對外聲稱預產期是8月，但前晚深夜11時許，她在老公、經理人鍾珍和助手陪同下，秘密到舊山頂道嘉諾撒醫院待產，戴上口罩、cap帽遮樣的Kelly，見到記者時表現愕然，在醫院保安護駕下迴避追訪。

放大圖片	Kelly前晚在老公Alex（箭嘴示）及經理人鍾珍陪同下入院，剖腹產子。

Chace勇猛獵人

昨午一時許，Kelly的經理人公司向傳媒廣發喜訊，指她昨早剖腹誕下6磅重男嬰，母子平安！夫婦二人看到兒子後，均喜悅萬分，BB的出世日期比預產期早了少許，據知取了英文名Chace，據資料所示，「Chace」這個名字有獵人的意思，代表男孩很威猛，追求目標很有毅力。鍾珍說：「BB嘴仔似媽咪，鼻子似爸爸，好靚仔又乖，冇乜點喊，唔使照燈。」

Kelly助手Leo在醫院對記者說：「Alex有陪Kelly入產房拍DV及影相，母子平安，大家好開心，因為今日太多傳媒，所以雙方家長、親友唔會嚟。（Kelly係咪早產？）其實係醫生建議呢個日子，冇擇時辰。（BB幾點出世？）唔方便講，費事洩露時辰八字。」Kelly會試餵人奶，對其身體狀況？Leo笑說：「瞓吓抖吓，懵懵哋！」至於Alex有冇親手剪臍帶？他說不清楚。

Leo轉述Kelly的感受：「終於見到踢我咁耐嘅BB出世，見到佢嗰一刻好感動，聽到佢喊聲好sweet、好冧，Alex都覺得BB把聲好man、好磁性。」BB於7．10出世和張學友同月同日生，Kelly則笑說：「希望BB好似學友咁有成就咁叻，順便同學友講聲生日快樂。」而Alex會一直留院陪伴兩母子，稍後Alex會大派雪茄。

陳爸爸送金牛

昨午五時，陳父在中環離開公司時接受本報記者採訪，笑逐顏開的說：「聽人講BB幾靚仔，但我怕記者未去探住，Kelly生完都好『wing』，唔好阻佢休息。（送乜禮物？）金牛。（改名未？）佢哋有幾個名諗緊，未決定。（叫Kelly追多個？）應該冇咁快。」

為Kelly接生的名醫何永超醫生，由於他工作太忙，何太代接受電話訪問指BB好健康精靈，體重6磅不算太輕好合理。對Kelly的情況亦很滿意，剖腹手術順利，過程只需一小時。對預產期是8月，何以提早開刀？何太說：「呢樣要搵佢經理人問，唔可以講太多病人私隱。（因Kelly已36歲所以要剖腹？）醫生和病人決定，未必同年紀有關。（Kelly適唔適合餵人乳？）要視乎能力同身體狀況。」