據元秋憶述，七小福當時年紀小小，經嚴格訓練下，總算培養出自律的一面，然而孩子貪睡卻無可避免，她說：「嗰時我哋成班細路就係喺學校個廳度打地鋪瞓覺，平日師傅晨早六點就已經拎埋條藤條入嚟，逐個打到我哋起身，你諗吓我哋幾爛瞓呢！但一個禮拜梗有一日係唔使師傅操心，嗰日就係星期日放假日，師傅話『你們這班小子，平日打也不起床，星期天還不夠六點，就已經全走掉』，梗係啦，邊個唔想有咁快得咁快返屋企呀！只有幾個冇屋企返嘅師弟，至會放假都留喺學校度啫！」

師母愛錫‧好餸侍候

面對這班連賴床也懂得隨機應變的徒弟，于師傅也嘖嘖稱奇，何況徒弟們間中還懂得投其所好，滿足作為師傅的心理與財政需要。

元彪說：「我哋細個最開心就係過新年嗰幾日，又唔使練功，又有得加餸，仲有利是添！雖然呢頭完，嗰頭就要畀番師傅，但唔使練功已經係最大封嘅利是。嗰時師娘都會封利是畀我哋，每次佢都話『唔准畀番你哋師傅㗎』，佢講係咁講，但我哋咪又係呢頭完，嗰頭上繳，唔好話落格，我哋連抽水都唔敢。」

元菊附和着說：「我哋每年大年初二都會上師娘屋企拜年，佢會整好多好餸畀我哋食，即使到咗後來我哋個個離開咗學校，都依然會約定大年初二向師娘拜年。我記得細個我哋過新年，師傅會着件唐裝，就算依家諗番起都覺得佢好型㗎！」

初一初二‧開工大吉

過時過節，毋忘向于師傅進貢一點點利是錢的七小福，原來本身亦生財有道，難怪可以做到錢搵得來，亦使得去，元彪說：「嗰時年三十都要做戲，係初一、初二有兩日抖，我哋就會偷偷地攞學校做戲用嗰啲獅子頭，夜晚拎出街去拍門表演利是，都成一毫子一封㗎，賺番啲零用，師傅當然唔知，畀佢知道仲得掂？唔通想開年咩？」（二十）