曾於美國居住的汪詩詩（Cissy），八年前認識電影《火拼時速》導演畢特烈納，畢特烈納與米高非常老友，經常到其家中作客，因此Cissy有機會參觀米高的夢幻國度，還住宿了一晚。不過Cissy就沒有當時的相片，因為米高下令到訪者不得拍攝，更要簽下同意書才可內進。

參觀動物園

Cissy說：「我都未去到佢屋企門口，已經有保安要我哋入一間房內簽約，好似過關咁！入到去就食lunch，跟住就四圍參觀，去咗動物園。裏面有獅子、老虎、鹿、鱷魚等動物，之後夜晚就同米高一齊食晚飯。佢有私人餐牌，亦有私人廚師，我哋食咗漢堡同意粉等食物。佢個廚房仲有兩個好大嘅雪櫃，其中一個裝滿唔同味道嘅雪糕，米高仲攞咗啲雪糕畀我哋食，不過當時我掛住玩冇食到。」

辦公室睇戲

晚飯過後，眾人去了米高的辦公室看了一齣電影《反斗奇兵2》，Cissy更稱米高看得津津有味。問到為何不去米高的私人影院看電影？她說：「佢係有私人影院，不過佢唔鍾意去嗰度睇戲，佢鍾意喺佢辦公室入面睇。其實佢辦公室都好大，有好多個螢幕，我哋就喺嗰度睇戲。米高睇得好開心，因為佢好鍾意睇卡通片，不過咁黑佢都冇除低太陽眼鏡。」

Cissy透露米高比較寡言，很多時候都由她發問來打開話題：「都係傾吓佢嘅興趣同收藏，佢個人好怕醜，而且講嘢同動作都好慢條斯理，同喺舞台上面係兩個人！」如今米高逝世，Cissy非常懷念對方：「佢唔單止係一個巨星，直頭係一個傳奇！」

文：名人組