近日鍾欣桐（阿嬌）被發現打針瘦腳，師姐容祖兒則自言是實幹型，凡事喜歡親力親為，平日愛拍廣告時跳跳紮瘦身，並笑言不會隆胸，因平胸跳舞時不會讓人眼花繚亂，擺明幽自己一默。
昨日容祖兒、蔡卓妍（阿Sa）及陳偉霆齊齊獲得「Yahoo！感情品牌大獎2008-2009」的廣告代言人大獎。正在拍廣告的祖兒抽空出席，她說：「拍緊個運動服廣告，都幾辛苦，好似馬騮仔上身周圍郁，做好多唔同嘅甫士。近年拍親啲廣告都要郁嚟郁去，可以順便減肥，所以希望可以拍多啲廣告，咁就荷包脹，人就瘦，拜拜肉冇晒，可以安心截的士。」
天生實幹喜做運動
記者指祖兒可以效法阿嬌打botox瘦手，她笑說：「其實唔止阿嬌用咗之後有影響，依家好似係個趨勢咁，不過自己條命係實幹型，靠自己做運動啦。」她又強調不會隆胸，並幽自己一默地說：「我幾enjoy平胸，因為着衫會型啲，而且跳舞唔會有多餘嘅肉，唔會整到觀眾眼都花埋。」
阿Sa想買過億單位
同場的阿Sa則表示很滿意今個月的廣告收入，希望可以買樓自住。她說：「我不嬲買樓都係租出去，好想買個單位自己住，不過睇啱嗰啲都億億聲，買唔起。（有乜嘢要求？）至少要有足夠嘅空間啦，因為我同媽咪住，而且又有五隻狗，同埋私隱度要夠高，保安要好森嚴。」問阿Sa現有幾多個物業？她即數數手指說：「都有幾個㗎。（係咪做富有收租婆？）我都唔係好勁，好羨慕以前啲明星，有成條街嘅物業，好想好似佢哋咁！」
文：名人組