楊千嬅及王菀之（Ivana）前晚出席今晚舉行的音樂會綵排，身為音樂會大隊長的千嬅聲音沙啞，半失聲的她說：「之前去成都返嚟哮喘病發，搞到『扯晒蝦』，之後去照內窺鏡，醫生話聲帶腫晒。」千嬅表示即向好友陳奕迅求救：「佢介紹醫生畀我，依家食緊類固醇，食咗三日，不過把聲都未開到，有需要都會打開聲針。」由於千嬅年前舉行演唱會時，一連七日打開聲針，她說：「當時打到透支咗，搞到腫晒好似唔想撈咁。（丁子高有冇慰問？）都唔想畀人知，驚嚇親阿媽。」