在停工的日子，阿嬌曾經要食鎮靜劑控制情緒，在這復工的四個月，依然要藥物傍身，她說：「食『靜心』，因為話可以紓緩心情，袋定先，覺得忟憎就要食。（冇再食鎮靜劑？）當時係阿Sa（蔡卓妍）借出嚟，係醫生開畀佢，佢之前緊張。」

阿嬌與阿Sa並肩作戰八年，一場慾照風暴，令阿Sa要孤身走路唱《二缺一》，當日阿嬌聽到這首歌，頓百感交集：「覺得好沉重，一個遺憾，無可奈何嘅二缺一。（聽到喊？）少少啦，之後公司喺卡拉OK聚會，我有唱呢首歌，當時阿Sa唔喺度，感覺好怪，我都係二缺一，之前係兩個share，依家自己去面對，感覺好失落，雖然個樣開心。」

取回85分尊重

復工後，阿嬌的工作量明顯比Twins時期銳減，她倒樂天知命：「慢慢嚟，開始做番嘢好緊要，唔會好急要好似以前咁多嘢做，我都要適應，初時見人有啲驚，驚大家眼光，好多嘢想問想知，依家冇嘢。」

雖然前路茫茫，但阿嬌卻抱正面態度：「我覺得人應該向前看，唔好諗番轉頭，保持心境開朗真係有用，唔會鑽牛角尖。冇奢望好似以前咁輝煌，最起碼得到一個尊重，我覺得冇嘢比呢樣重要，我已經攞番好多，如果一百分，我攞番八十五分，雖然有不滿聲音，但自己要撐到底。」

廿八歲的阿嬌還有漫長人生路，問到她如果將來有男友再要求拍慾照，她如何處理？阿嬌說：「應該唔會有人要求，如果有梗係拒絕，玩嘢咩，如果提出呢個要求，都唔係錫我囉。」

阿嬌的舊愛陳冠希外表英俊，現在她可會不再揀靚仔？她說：「我冇話特登揀靚仔，相由心生，最緊要唔好咁易呷醋、小器、理多啲我感受、孝順。（陳冠希算唔算心地好？）呢個唔回應。（對佢仲有冇感覺？）唔回應，唔想再答佢問題。」

撐麥浚龍出色

談到有指緋聞男友麥浚龍（Juno）借阿嬌上位，但她卻力撐：「唔覺，我覺得佢音樂、工作都好出色，始終每次訪問都有人問，唔通唔答咩。（撐佢？）唔係咁講，大家朋友。（男朋友？）呢啲我唔回應，我依家冇拍拖。」

阿嬌現在對愛情抱着隨緣態度，還笑問記者和助手：「有冇好介紹？（唔會驚咗男人？）唔係全部男人都衰，小心啲囉，如果介紹錯賴你㗎，哈哈！」

採訪：音樂組

攝影：馬永堅

服裝：Pinko

場地：香港演藝學院