眾師兄弟中，二師兄元泰與師弟元彬可說最有緣，元彬說：「元泰係我死敵嚟嘅，唔理我去到天涯定係海角，佢都有本事棟喺我面前，然後捉我返去見師傅。」

元彬出走‧元泰尋人

元彬憶起舊事，雖裝作餘怒未息，但表情未見激動只見寬容，顯然只是鬧着玩，手足情仍很堅固，元彬說：「記得有次我又偷走，去咗一間工廠啤塑膠，有日啲工友話有人搵我，我心諗邊個知我喺度呀？點知出去一睇竟然係元泰，佢叫我返師傅度，我起初都唔肯，但佢話師傅保證咗唔打我，我都唔知點解嗰時又會信，連喺塑膠廠度做咗廿幾日嘅人工都唔攞，就咁跟咗元泰返去，咁奇嘅事都會有嘅！結果我返到學校，隻腳都未踩晒入個門口咋，就已經被師傅打到飛起，你話元泰幾本事呢！」

元泰在旁靜靜聽着，待師弟說完才開口公開尋人秘訣，盡顯身為師兄的穩重風範，他說：「想知道你去咗邊，唔難，去你屋企問你阿媽咪得囉！你次次偷走，我都係去搵你阿媽，問你去咗邊，佢唔單止會同我講你行蹤，仲例必整啲鵝蛋出嚟請我食，你知啲鵝蛋又大隻又好味，所以你每次偷走，我都好主動去搵你。」

朝夕共處‧親逾同胞

元泰這招順藤摸瓜或許略帶取巧，然而同門之間關係比親兄弟更深厚卻是不爭事實，始終日夜相對，感情就在鬥氣、頂嘴中孕育出來，元彪不諱言：「嗰時我哋好日都唔返屋企，同親兄妹嘅感情都唔似得同師兄弟咁好，好話唔好聽，真係親密到連邊個師兄弟放咗個屁都聞得出。」

元彬亦異口同聲說：「我哋日對夜對，我敢保證同自己親兄弟姊妹相處嘅時間，加埋都唔夠同師兄弟喺埋一齊練功咁多，我哋真係只要聞到陣味，都可以噏得出係邊個嚟，唔使望都可以知道對方嘅存在。」（十四）