據二師姐元甫憶述，于師傅當年的密集式訓練，令人聞風喪膽，她說：「六點鐘起身先上屋頂走圓場，之後倒立一個鐘，再練基本功，練到十二點食飯，一點又開始練：觔斗、地氈功、趴虎、寸子、虎跳、倒立，再加一百下掃堂腿，練到五點先有得停，如果要去荔園表演，通常六點出發，八點開鑼，做完戲師傅會即場檢討，返到學校差唔多十一點幾。」

練功秘方‧人人叫慘

經年累月的體力消耗只是身體勞累，最令一班小豆丁膽怯退縮的，卻是于師傅的獨門練功秘方，元甫說：「有時師傅會放塊香口膠喺你鼻尖，要你用腳踢番落嚟，練你腿功，又要你兩個人一組，背對背壓一字馬，最攞膽係師傅會將你打橫放喺佢大髀，將你條腰係咁向後拗，痛到個個嗌救命，但冇辦法，呢啲個個都經歷過，師傅亦都唔會因為你叫得慘而手軟。」

對於這段非人歲月，成龍在自傳《我是成龍》中透露：「如果想嘗試用生病、受傷來作為減少練功的藉口，對師傅來說是起不了作用。在師傅眼裏，只要你還能動，就表示你能飛。所以，以生病來解釋練功不足，或動作不當，都不會被接受。」

好逸惡勞始終是人的本性，于師傅雖嚴，一班七小福亦有他們的對策，元秋說：「你估師傅知唔知邊個偷雞？邊個掃堂腿半下當一下？但一百下實在太攞命，我哋成班細路都唔理得咁多，有得偷雞就偷雞，罰到嚟先算。」

逼走老師‧軍人上場

小孩子愛蹦蹦跳，雖然辛苦，但習慣了總可應付得了，然而最要命的，就是要他們坐定定讀書。據元彪憶述，于占元後來請了教書先生每日五時跟七小福上卜卜齋，才是最大的懲罰，他說：「師傅搵啲老師嚟教我哋識字、認字，我哋邊度鍾意讀書㗎？於是成班細路夾埋嚟蝦個老師，師傅覺得個老師太軟弱，後來換咗一個軍訓出身嘅老師，我哋即刻冇運行。」

（十二）