出道七年的裕美早前因不滿唱片公司將其塑造可愛形象兼安排唱兒歌，據悉裕美一怒之下曾主動要求解約，因而被公司掟入「雪櫃」，近半年零工作的裕美最終扮死狗向公司「重修舊好」，但不獲「解凍」。
最近去了日本的裕美接受本報長途電話訪問，她承認跟公司有爭拗，但強調未致於「反枱」，她說：「我14歲簽呢間公司，今年21歲，見到咁多咁後生嘅新人加入，我都有啲擔心，公司要我扮cute，但我唔細喇，我好緊張我嘅事業，想嘗試唔同嘅嘢，唔想嘥咗青春！」問裕美是否主動向公司提出解約？她說：「吓？冇呀……」
至於裕美所屬的Snazz行政總裁簡文迪昨日在電話中怒氣沖沖說：「我承認佢係唔鍾意唱兒歌，每個藝人都有情緒問題，邊個藝人冇呢啲經歷？邊個藝人唔使捱？佢簽得呢間公司唔通我會害佢咩，咁對公司有咩好處先？（公司雪緊佢？）總之就畀佢思量吓！」