楊千嬅前晚擔任《美女廚房》嘉賓。節目開始時鄭中基介紹千嬅出場，千嬅坦言從未如此驚過，鄭中基問她驚甚麼時，她謂：「我見到你嘛！我怕我唔覺意毒死你！」鄭中基即謂：「該死唔使病！」他又笑指千嬅最拿手整「肉丁雞子炒年糕」，簡稱「丁子高」。

江若琳廚藝嚇人，堪稱新一代地獄廚神。	梁漢文與鄭中基夾手夾腳整蠱周中（中），場面搞笑。	千嬅捉鱔時嚇到嘩鬼叫。

讚舊愛手勢OK

有廚師Uncle幫手的千嬅，煮得一手好菜，被問到有否煮過給「舊愛」鄭中基吃時，她說：「唔重要，陣間食咪得囉！我唔會毒佢嘅。」事後問鄭中基有否試過千嬅手勢，他說：「試過，佢手勢都OK，不過我畀分唔會鬆手，（冇感情所以冇感情分！）感情個個都有，之不過之前啲分畀得太鬆，依家畀番緊啲。」

鄭中基透露下一集便是總決賽，問到緋聞女友阿Sa時，他說：「原本呢集有，但最後佢檔期唔得，（所以搵千嬅？）唔係，不嬲都有千嬅！（好在阿Sa唔得，否則你咪好弊？）冇事嘅！」

錢嘉樂試食千嬅煮的餸時謂：「阿嫂煮嘅！」吃完又拍拍鄭中基說：「娶得過！」千嬅聞言即啋啋聲。輪到鄭中基食時，錢嘉樂又抵死的謂：「一殼眼淚呀！愈食愈傷心，餐餐食都願啦！你走寶呀！」鄭中基說：「願呀！願呀！」周中又加把嘴：「你食係酸啲嘅！」鄭中基吃完畀千嬅十分，更謂：「的確有驚喜。」不過，廚藝最嚇人的是同場的江若琳，條魚炸到被指似有「皮膚病」。

同陳冠希電聯

此外，千嬅被問到契細佬陳冠希返港一事，她坦言與對方有通電話，覺得他成熟了，說到陳冠希想返港發展，她說：「我冇同佢傾呢樣嘢！佢都係想照顧屋企人，佢好孝順。（佢話曾經喺外國沙灘喊？）當年發生嘅事都好大困擾，過咗要重新開始，好似柴九話齋，人生有幾多個十年。」對於陳冠希被指「食言」，她說：「如果佢工作涉及公益慈善，都係履行緊佢諾言。」

文：影視組