走音偶像充斥樂壇，唱得之人衞蘭（Janice）向高難度挑戰，新歌唱出澎湃激昂的高音，原來最初黎明覺得這首歌冇特別，在Janice極力爭取下才收錄，還被選中做主打，黎老闆幾乎走寶！
Janice將於七月推出英文碟《Morning》，主打歌《Rainbows》由新加坡籍的音樂人陳台證（Taz）作曲兼監製，由於歌曲澎湃激昂，被視為Janice騷哥利之作。不過，Janice卻踢爆老闆黎明（Leon）最初唔識貨：「聽完demo之後，我覺得呢首歌好特別，高音位飆到好高，但Leon就覺得冇特別，係我主動爭取要求唱，出嚟嘅效果令人好滿意，希望Leon都鍾意。」
監製讚：好滿意
由於歌曲其中有句旋律飆到極高音，令Janice的唱歌技巧備受考驗，但最後她只花了三日時間灌錄，連監製Taz亦讚謂：「之前都知Janice唱得，佢錄呢首歌冇令我失望，唱得好好，好powerful，證明佢去到另一層次，令我好滿意！」Janice亦說：「呢首歌飆到好高音、好盡，之前未試過，不過錄音過程好輕鬆，可能係英文歌關係，唱得好舒服，唔同以前唱國語歌要一句一句錄。」
由於近年走音偶像充斥樂壇，被網友大彈兼唾棄，今次Janice的新歌擺明騷哥利，被視為示威之作，Janice笑說：「只係我喺長大嘅過程中做一件事，冇諗過新碟賣得好唔好，如果成績好就更好，希望每年做一隻英文碟。」
互爆為食事件
問Taz可覺得Janice有進步空間？Taz坦言：「佢有優點，不過情緒未必每次投入到，有時肚餓要外賣，休息吓至投入。」Janice笑着還擊指Taz也不時要吃朱古力，毫不遜色。為宣傳新碟，Janice將於7月12日舉行音樂會，並將邀請監製Taz出席。
她又信心十足地表示現場唱高音不感壓力：「有監製在場更有信心，佢之前寫過首國語歌畀我，因為自己咬字唔正冇用到，覺得好遺憾，好開心今次有機會合作。」
採訪：音樂組