古仔、劉青雲、吳彥祖（Daniel）、方中信、陳偉霆（William）及王敏德六大型男，昨日齊齊出席新片《竊聽風雲》宣傳。由於古仔與青雲已是第八次合作，故二人同聲表示默契非常，就連眼神及肢體語言亦甚有交流，最慘是Daniel夾在二人中間，難怪他笑言：「青雲同古仔都好黑（皮膚），我好白，驚加入唔到。」
每六個鐘跑一次步
古仔在片中角色較青雲年長，故他自言在造型上落足心機，前後增肥三十磅，不過由於煞科時角色卻要激瘦，故他花了三天時間「絕食」，成功減去廿磅！談起自己「先肥後瘦」，古仔不禁謂：「嗰三日淨係飲水，每六個鐘跑步一次，每次跑兩個鐘，諗番起嚟真係好辛苦，總之唔死得都算好運。」
「影壇新丁」William首天開工便連累古仔狂吞飯盒，他說：「嗰場戲講我同佢傾偈，不過佢就喺度食緊飯，結果我NG咗四、五次，佢每次都差唔多食咗半盒飯。古仔好好人，不但冇嬲，仲不停教我做戲。」
王敏德捉仔女對稿
談到日內將為韓國天王Rain的fashion concert擔任嘉賓，William表示：「我要同佢一齊行騷，佢咁高大我諗住訂番對五吋踭嘅鞋嚟着，同埋食多啲嘢操番大隻啲襯佢。（同佢鬥舞？）邊有得鬥呀？」William又透露暑假將有三部自己有份參演的電影上映，且表示已愛上演戲。
方中信打趣表示能夠與古仔、青雲及Daniel三位「前輩」合作，令他開心不已，又向青雲派高帽謂：「同對上一次比較，佢仲係好好戲。」而不諳廣東話的王敏德為了其中一場戲的冗長對白，竟在家捉着子女對稿，難怪他笑指經此一役後，他的廣東話進步了很多。
文：影視組