陳冠希（Edison）日前接受CNN訪問重提慾照事件，受害人之一的鍾欣桐（阿嬌），其經理人霍汶希（Mani）直斥Edison在受害人的傷口上撒鹽。Edison曾表示要退出香港娛圈，但近日卻回港高調地受訪，被指冇口齒，Mani即寸爆地說：「係佢選擇！」
昨日Mani偕同鄭希怡（Yumiko）、洪卓立、湯怡及詩雅等出席活動，跟莊思敏及周秀娜同場。說到Edison近日高調地接受電視及雜誌訪問，當中談及慾照事件，Mani認為Edison毋須再重提舊事，斥他在別人的傷口上撒鹽，不過Mani說：「每人有自己選擇權利，呢個係我個人諗法。」問她阿嬌有否唔開心？Mani謂：「佢冇再睇呢啲新聞。」
Edison曾揚言會無限期退出香港娛樂圈，現在他透露有意復出，Mani聞言即寸爆地說：「佢係咪唔識中文？（佢用英文講。）哦。（認為佢冇口齒？）係佢選擇權利，與我哋無關。（點睇佢復出？）唔評論。」而對於CNN的宣傳短片中重現慾照，Mani說律師正在處理中。
阿嬌唔再諗
而阿嬌亦對陳冠希公開道歉作出回應，她平淡地說：「我自己嘅人生已去到另一個階段，有個新開始，呢啲係過去嘅事，特別係一啲唔好嘅回憶，唔會再去諗。」同屬英皇的Yumiko指事件已發生超過一年，不應再沒完沒了去評論，洪卓立和湯怡亦認為事件應到此平息。Edison在訪問中透露慾照超過千三張，湯怡表現驚訝，而洪卓立則諷刺Edison謂：「希望佢唔好再壞電腦。（擔心阿嬌？）佢過咗唔開心時期，佢依家好堅強。」言語間力撐師姐阿嬌。
莊思敏驚訝
另外，莊思敏對於慾照不止千三張亦大感驚訝，她更反問記者：「有幾多張？唔係有萬三張嘛？我想知有咩人、有無新啲。」對於Edison有意復出，莊思敏說不會抗拒，但卻暗寸他說：「做戲唔好再扮乖仔。（拍三級片？）拍暴力三級就夠，色情三級我唔想睇，（睇夠？）哈哈！」
文：名人組