剪掉二十吋頭髮的舒淇，二十年來首次以短髮look示人，清爽形象令人煥然一新。對於有傳舊愛黎明將在演唱會上宣布與女友樂基兒的婚訊，舒淇大方祝福，多年感情早已隨三千煩惱絲煙消雲散！
前晚Dior舉行「黃金時裳：巴黎與倫敦1947至1957年」展覽及09秋冬時裝發布會，大會特別請來中田英壽、任達華、琦琦、黃偉文、楊紫瓊及譚元元等出席酒會，其中剛從康城返港的舒淇亦有赴會，剪了一頭短髮的舒淇甫見記者即說：「假髮嚟㗎！我仲同髮型師講點解個假髮咁真嘅？」其後才笑說剪掉了長髮：「諗住清爽啲嘛，之前兩個禮拜好忙，成日一頭長髮好煩，所以返嚟就剪咗去。」
唔同陳冠希見面
舒淇又謂身邊人都愛她這個新形象，因為長髮look已看膩了：「我已經20年冇剪過短頭髮，今次一剪就剪咗20吋，（有冇唔捨得？）剪完之後我望住啲頭髮兩分鐘，跟住同佢哋講拜拜，返到屋企仲為佢哋祈禱，不過就冇喊！」
其後記者問她在飛機上可有戴口罩？她說：「冇呀，其實我飛過去嗰程有少少感冒，我都有戴口罩上機，但去到嗰邊發覺冇人戴口罩，所以我就除咗囉！」對於舊愛黎明七月開演唱會，舒淇表示有時間一定會捧場。提到有傳黎明會在演唱會上宣布婚訊，她即笑說：「最好啦，開心事值得為佢哋開心！」至於同公司的陳冠希秘密回港，舒淇表示應該沒有時間跟對方見面，不過就不擔心對方的人身安全，因為香港是法治社會。
楊紫瓊物色新人
同場的楊紫瓊透露現正物色新人加入其公司，她認為一個新人最重要是打好語言基礎，並謂很欣賞譚耀文。問到梁洛施讀完書後可會拍戲？她即避談說：「咁你要問佢喇！」
文：名人組