本文重點
金牌大風的人事變動惹來滿城風雨，老闆鄭東漢前晚帶同新任CEO陳輝虹現身廣州音樂頒獎禮，鄭東漢開腔直言唔想兒子鄭中基出任CEO；身旁的陳輝虹亦協助「拆彈」，否認公司分黨派，但坦言傅穎的走音事件有負面印象，要畀時間執吓先！
【盧坤穎廣州直擊】金牌大風最近高層變陣，即惹來是非一籮籮，前晚老闆鄭東漢及新任CEO陳輝虹出席新城電台協辦的「華語音樂盛典2009」頒獎禮，記者上前問及鄭東漢，有關鄭中基被指將出任金牌大風CEO的傳聞，他說：「我相信佢個人唔可能，認識佢嘅人都知佢唔想做。（你想佢做？）我反而唔想，佢自己有鍾意嘅嘢做緊，做得咁開心，做乜要逼佢做？真係好奇異，大家都見到成個CEO企喺度啦！」說罷便指住旁邊的輝虹。
Stephy出書送碟
對於有傳小肥、傅穎等歌手無得留低，輝虹表示全部歌手都有合約，近日亦忙於與旗下歌手商討未來工作大計：「最快派歌應該係Kary（吳雨霏），RubberBand都好有實力，希望今年可以再上一層樓，而Stephy（鄧麗欣）七月出書，入面會有埋新碟。（傅穎呢？）佢都會出書。」
他承認傅穎因走音事件令觀眾有負面印象，但解釋因對方太忙冇時間練歌：「我哋覺得佢喺繪本、文字上更出色，只係潛質未發揮，畀啲時間佢啦！」
公司冇分黨派
至於黃栢高未有現身，他表示對方要專注電影：「今晚（前晚）係音樂頒獎禮，我哋係嚟帶幾個藝人出席。」曾兩度杯葛新城頒獎禮的金牌大風，今次活動是否破冰？輝虹謂：「唔係，只係合作無咁和諧，嚟緊金牌大風都希望喺呢個頻道再次獲得支持。」
輝虹又否認公司分黨派，認為當所有公司出現人事變動，就會有這樣的傳聞：「音樂係最大資產，藝人每個都咁重要，坊間嘅揣測，時間會證明一切！」
另外，傅穎昨日現身活動時，被問及近日的是非會否影響心情？她說：「年頭睇相都話我多是非，不過年年都係咁講，相士仲話我唔適宜拍拖，話我啲桃花去晒事業度！」