周麗淇（Niki）於旺角花園街拍外景，主持阮小儀、農夫給她廿元，要她買花、椰汁、金魚及魚蛋，更暗中與老闆夾計刁難她，不過口才了得的Niki竟然冧掂椰汁店老闆與她分帳，結果她倒賺了數十元，笑言是自己出力劈椰子的「血汗錢」。
Niki前日帶同師弟徐浩信於人來人往的旺角街頭為無綫節目《農夫小儀嬉》錄影，吸引市民圍觀。主持人給了她廿元，要她買東買西，不過他們事前已跟各老闆夾計，免Niki順利過關，然而Niki識落嘴頭，不論男、女老闆都被她冧掂，分別以一蚊價錢買到六條金魚、一打玫瑰花、五串魚蛋。之後去椰汁店，她親手拿菜刀劈椰子、榨椰汁，更不時叫喊：「埋嚟睇、埋嚟揀！」成功賣到多杯椰汁，賺了數十元。
榨椰汁好似榨奶
雖然Niki弄致身水身汗，卻大叫好玩，她說：「頭先榨椰汁好似我喺日本榨牛奶呀！最衰我同師弟一人飲咗一杯椰汁，如果唔係可以賣多兩杯嘅錢，不過啲人好熱情、好好玩。」問她平時會否到旺角購物，她說：「都會㗎！我好鍾意喺度買嘢食，但都係買上車食。不過，Niki的「血汗錢」最終都沒有自己袋，交了給農夫代捐畀慈善機構。
上廚房拒見嘉穎
此外，現時日本的豬流感（H1N1甲型流感）有多宗確診，剛於日本返港一星期的Niki大叫好彩。另外，Niki昨日到電台宣傳七月推出的新碟及書，透露已答應亮相《美女廚房》，可擔心找來鄭嘉穎做評判？她反應頗大說：「啋！（點解啋？）唔好囉，（可能叫你摸蛇？）黐線。」當DJ送她恨嫁四寶，其中一寶是提防小人的書，她哈哈大笑。而DJ叫她提防將來老公身邊「狐狸精」，她笑謂最好唔好滾。
文：影視組