陳偉霆（William）昨日出席公開活動，對於緋聞女友Angelababy日前否定他男朋友身份，William得知後亦不甘示弱，即時得戚回應說：「我都冇認佢係我女朋友喎！」未知兩人關係有變，還是一對小情侶隔空耍花槍？
William跟好友關智斌（Kenny）昨日出席高達模型的公開活動，兩人見到巨型的高達就愛不釋手，爭相合照，更親自指導歌迷鬥快砌模型，不過就顯得雞手鴨腳，笑料百出。Kenny坦言自細愛上高達模型，連入行第一份薪水都奉獻畀高達，屋企的模型太多，不時要轉送表弟，或者賣給二手玩具店。
唔想講緋聞
William對於緋聞女友Angelababy成功簽約avex，打入日本模特兒市場後，日前在活動上否定他男朋友的身份，他回應說：「唔認我？我都冇認佢係女朋友喎，（低調戀情？）唔想講咁多，唔想再講緋聞，專心喺工作上面，我同佢一直都係朋友，唔關佢簽新公司事嘅。」
屙嘔喉嚨痛
雖然William媽咪日前自爆Angelababy曾往拜年，並對她有讚冇彈，不過William昨日表示兩人最近都沒有碰面，強調朋友關係不會因為相隔兩地而轉淡，但記者繼續追問兩人關係時，William即時扯開話題，自爆最近出現屙嘔及喉嚨痛等病徵，嚇得身旁的Kenny即時保持距離，擔心自己被感染。
採訪：音樂組