近期人氣急升的趙碩之，前晚出席錄影節目姍姍來遲，雖然碩之死撐冇遲到，但為了補鑊息「民憤」，她玩遊戲時毫不錫身拋胸打觔斗，實行搏盡演出。
碩之、龔嘉欣及李蘊前晚擔任無綫節目《大咕窿》的嘉賓，節目原定於九時錄影，不過因碩之姍姍來遲，令眾人在場呆等。
拔罐留印
碩之接受訪問時死撐自己冇遲到，她說：「我過嚟嘅地方好近，應該唔會遲到。（全部人都等你喎！）我預早咗半個鐘，應該冇遲嘅。」解釋一輪後，她即扯開話題自稱弄傷腰部：「之前做gym整到條腰，所以去咗拔罐，點知拔完背脊一個個印，但差唔多日日都要着沙灘裝做嘢，所以好尷尬。」
可能碩之知道自己累人遲收工感不好意思，故她在節目玩遊戲搏到盡，除拋胸打觔斗外，龔嘉欣孭她玩遊戲時更不慎雙雙倒地，但碩之毫無怨言，認真落力。
李蘊羨慕
對於碩之的激凸身材，龔嘉欣與李蘊均表示羨慕，李蘊說：「一望住佢某啲部位都有壓力。（會唔會叫佢唔好咁性感？）佢身材咁好，着咩都一樣。好似我呢件衫如果佢着都有唔同效果，所以玩遊戲時太薄嘅板唔會畀佢玩，因為我驚佢過唔到。」在旁的碩之聞言即謂：「緊咩張！又唔係鬥身材，我唔覺身材會係障礙，話明大咕窿，啲位就梗係預大咗。」
文：影視組