香港確診有豬流感（H1N1甲型流感）患者，身在無錫拍劇的郭晉安亦有關注，他直言內地居住衞生環境和食物質素較差，而同劇演皇帝的內地演員不停咳嗽，令他心理大感威脅，每日也食八隻蛋白保持體格健康。
郭晉安最近在無錫拍攝《刁蠻嬌妻蘇小妹》，他笑言酬勞十分豐厚：「之前同呢個老闆合作過《八仙過海》，聽講都賺咗錢，所以今次再搵我。」劇中他飾演一名貪財的才子，與內地女演員董旋飾演一對。
對於香港最近確診有豬流感個案，安仔直言也有留意，雖然內地仍未有確診個案，但拍劇期間有一位演員經常咳嗽，令他有點擔心。
唔敢食豬肉
安仔說：「飾演皇帝嘅演員，佢咳足一日，唔使埋位都要同佢保持距離。（唔戴口罩？）我上咗去個幾月，所以冇準備。」安仔並透露現時暫居地方的衞生環境及食物亦不太好，他解釋：「我住嗰度都幾污糟，廁所裏面有曱甴、蜈蚣同四腳蛇，而食嘅餸都有啲驚，因為豬皮上面會有毛，所以我寧願暫時戒食肉，每日食番八隻蛋白用嚟補充蛋白質。」
返港擦餐飽
估計尚有三星期，安仔才能完工返港，他笑言要和老婆歐倩怡和囝囝大吃一頓：「母親節唔可以返嚟陪佢哋，所以我已經請咗佢同佢媽咪去食自助餐，老婆話好好味，我咪同佢講話返嚟要同我再食多次。」認真夠甜蜜。
文：專案組