香港驚現豬流感確診個案後，不少藝人自創「保險良方」，望將感染風險減到最低，不過方法實用與否，就見仁見智。
農夫：為抗H1N1流感，我哋呼籲歌迷用消毒洗手液洗手，喺簽唱活動，我哋都唔會同歌迷握手。阿媽話病毒係由捽眼同鼻再傳入體內，所以我哋都唔會捽眼同鼻。我（陸永）仲會用手踭㩒
，我寧願畀人誤會我有小兒麻痹症。
呂慧儀：勤做運動同食維他命C增強免疫力，好彩呢排唔使拍劇，唔使拍吻戲，唔驚會受感染，況且我平日都冇呢個習慣。
洪卓立：歌手成日都要入錄音室，為咗注意個人衞生，我諗最緊要都係事前特別消毒支咪囉。
謝天華：苗僑偉教我大清早飲杯淡鹽水殺菌，不過我覺得乜都係假，依家最緊要係食得就食，玩得就玩啦。
李曼筠：唔需要太過擔心，平日用漂白水清潔家居咪得囉。
張智霖：為咗增強抵抗力，今次疫情增加我戒煙嘅決心，平日去卡拉OK同登台，我都會自備消毒藥水清潔個咪先。我都考慮喺呢個非常時期，暫時唔畀囝囝返學。
泳兒：會食多啲中藥同維他命「打底」防疫囉！