本文重點
【戴佩玉上海直擊】劉嘉玲前晚到上海出席王家衛新公司開幕派對，多次被傳有孕的她，腳踏高跟鞋，以行動及親自開腔否認有孕；同場的舒淇則與前緋聞男友張震喜相逢，即使明知傳媒在場，兩人照樣頭貼頭「蜜」斟。
王家衛與友人合資的新公司「Axis Mundi台中央」前晚在上海外灘老碼頭舉行開幕派對，劉嘉玲、舒淇、張震、張智霖、劉偉強、張榕容、范植偉等均有到賀。
劉嘉玲身邊不見老公梁朝偉，換上好姊妹劉琍琍，兩人更以同款高跟鞋示人，嘉玲說：「偉仔練緊詠春，就嚟可以六塊腹肌見大家。（係咪接咗徐克新片《狄仁傑》演武則天？）係呀，六月中開工，要學騎馬，徐克仲搵老師教我宮廷禮儀，我都幾有興趣，少演古裝、武俠，呢個故事好吸引我。（婚後正式復出？）我都冇離開過，（係咪有咗BB？）到呢一刻都唔係，我仲要騎馬㗎！（擔唔擔心騎馬會『櫈』咗個胎出嚟？）你唔係咁講嘢呀？」
康城獵艷
而舒淇和張震這對緋聞情侶難得聚頭，竟不避嫌頭貼頭雞啄唔斷，當有人向舒淇通水時，舒淇更向鏡頭擺Ｖ字手勢，狀甚風騷，舒淇說：「我遲啲去康城做評審，大概會睇廿幾套戲，今次過去當Relax，睇吓到時有冇艷遇先！（好恨拍拖？）我不嬲拍緊，啱啱拍完嗰套戲，咪同戲中男主角拍拖囉！」
張智霖出入均有大批女粉絲圍着，他更逐一合照。問他幾時培養個仔做接班人？他說：「冇咁嘅必要，呢行辛苦，我會培養個仔做老闆，認識錢嘅價值。」此外，《天堂口》導演陳奕利則透露稍後會於北京開拍愛情電影，但卡士有待公布。