對於衞詩獲釋後返港，不少藝人都寄語她重新做人，蘇永康更以過來人身份呼籲大家給予衞詩機會。
蘇永康：佢應該沉澱吓，佢依家應該魂魄唔齊，我勒戒之後都需要兩年時間先知點算好。改過係最重要，希望大家畀機會佢，正如當年大家畀機會我。
Soler：尊重法官判決，希望佢珍惜機會糾正，依家佢最緊要身體健康，重新開始。
王友良：戥Jill好開心，希望佢多啲休息，冇聯絡關楚耀，唔知佢心情點，其他嘢等佢哋唱片公司處理。
陳偉霆：佢對音樂事業有好大執着，今次畀機會佢收埋自己、增值自己，我會支持佢，我冇見過圈中人食大麻，希望大家用正面方向睇娛樂圈。
泳兒：睇到報道見佢精神麻麻，又肥又腫，女仔遇到呢啲事一定受情緒困擾，大家畀啲空間佢，希望大家唔好抹殺佢過去嘅努力。
龔嘉欣：戥衞詩開心，相信佢已經得到教訓，（衞詩指傳媒壓力令佢吸毒。）唔方便批評，但紓緩壓力有好多方法，我會揀瞓覺、同朋友傾偈，最重要係方法適當。（有冇聯絡關楚耀？）一路有以普通朋友方式SMS佢，佢出事嗰輪都有，不過佢冇覆。