【吳靜嫻北京直擊】一直養尊處優的關之琳現時深居簡出，昨日之之出席The Swank北京首間旗艦店開幕活動，同場還有老闆康健熺及設計師Gae Aulenti。
拍戲非人生活
穿上Ermanno Scervino露肩裙的之之狀態大勇，問及會否效法林青霞及鍾楚紅復出幕前？她即時耍手擰頭，表示十分享受目前的平靜生活，年中見大家兩、三次就夠：「我享受做一個觀眾多過拍戲，拍戲太辛苦喇，簡直係非人生活，我以前都經歷過。（fans咪好失望？）我哋可以私底下見面，復出需要好大勇氣，脫離咗咁多年，我好似唔識點拍戲咁，亦冇任何戲癮，心態唔同咗！」現時她只做喜歡的工作，將工作量減到最低，享受行街看戲吃飯的平凡生活。
台商食飯解畫
早前之之被拍得與台富商陳泰銘吃飯，她沒好氣地說：「我哋係朋友，傳媒一定要誇張新聞先做到封面，總之唔係大家想像中咁複雜啦。（人哋有太太，怕唔怕被誤會？）我冇諗到咁複雜。」對於衞詩承認藏毒，之之認為這是個好警惕，提醒所有青少年要珍惜生命和事業。
另外，之之在廣告界卻非常活躍，最近在台灣連拍名錶及豪宅廣告，輕易穩袋千萬台幣酬勞，其好友李良慧指之之的酬勞一直無減。此外有傳張栢芝秘密接拍台灣房地產廣告，酬勞亦以千萬台幣計，惟香港藝人在台掘金，惹來當地廣告才子范可欽的暗寸：「香港藝人當台灣是提款機，規矩又多，只認錢冇感情。香港藝人是專業的，反而經理人好麻煩，要求多、規矩多，所以我都是喜歡用台星，價錢合理又容易溝通。」