昨日蔡卓妍（阿Sa）與鄧紫棋（G.E.M.）出席活動時，G.E.M.不斷自稱是Twins的忠實歌迷，令阿Sa尷尬傻笑。入行十年的阿Sa坦言雖然年紀不算老，但已是前輩級歌手，故不時提醒自己要適應。
阿Sa、陳偉霆（William）、泳兒、鄭希怡及G.E.M.等昨日出席戶外活動，主持人安排阿Sa與G.E.M.同台，身為Twins歌迷的G.E.M.多次強調買齊偶像的唱片及個唱DVD，曾與G.E.M.傳緋聞的William即抵死地打手勢，示意G.E.M.不要再講，但G.E.M.童言無忌繼續講，令阿Sa相當尷尬，只好不停傻笑。
否認壓力大求醫
事後阿Sa謂：「諗深一層我入行十年，Twins明年先十年，一定會搞歌迷聚會慶祝，時間真係過得好快。」她又慨嘆：「雖然自己早入行，依家都唔係好大年紀，但好似前輩咁，要開始慢慢適應。依家出道嘅人開始係九幾年出世，真係好勁。」有報道指阿Sa因壓力爆煲要睇內科醫生，她對此說：「壓力大唔係睇心理醫生咩？我冇事，身體好健康，每個人都有壓力，我會以瞓同食嚟減壓。」
自稱是Twins粉絲的G.E.M.，問她有否見過鍾欣桐時，她說：「冇，只係見過阿Sa。如果見到阿嬌會讚佢好靚女，亦會捉住佢影合照。（支唔支持阿嬌復出？）每個Twins歌迷都想見佢哋一齊。」
泳兒跳舞唔合格
另外，泳兒與William臨時被邀上台跳舞表演，由於兩人事前未有準備，舞姿相當搞笑。泳兒說：「頭先表現梗係唔合格啦！同原裝差好遠，不過我已經盡咗力。（事前係咪冇準備？）之前真係唔知大會會播咩歌，所以冇得練，惟有考天才囉。」曾在新加坡讀書的泳兒，以普通話與主持人對答，她謂：「普通話難唔倒我，反而講普通話仲好過講廣東話。」
文：音樂組