衞詩（Jill）「大步檻過」，免受牢獄之苦，不少圈中人為她高興的同時，亦鼓勵她重新振作，再戰樂壇。
梁漢文
「一個女仔困咗60日唔易頂，呢個懲罰已好足夠，大家要對佢有信心，可以『搣得甩』，睇新聞佢肥咗啲，證明佢食得瞓得，據聞日本『入面』會幫佢戒埋，錯咗都袋到啲落袋，希望佢可以重新振作啦。」
蔡卓妍
「我覺得有錯唔重要，最重要改過，咁先得到大家寬恕，make a wish想佢快啲冇事，同埋希望衞蘭唔好二缺一。」
詹瑞文
「畀咗一個機會佢重過自己嘅生活，對佢嚟講係好事。佢同佢家姐都好有Talent，希望可以繼續發展佢哋嘅事業。」
農夫
「戥佢同佢屋企人高興，始終一個女仔前途受呢件事影響好可惜，審判係為錯負責任同承擔，依家已經係最好（指不用坐監）。」
泳兒
「唔使坐係好事，都戥佢鬆口氣，人總會做錯事，三年好好思考同改過，日後再以全新衞詩出嚟。每個人都要面對壓力，但毒品絕對唔係減壓方法。」
吳鎮宇
「呢個判決對呢位後生女嚟講係好嘅，喺拘留所60日入面應該令佢反省，睇清楚以後條路點行，邊個到最後都喺佢身邊，唔好再沉淪海洛英；我覺得唔應該去斟酌判得重定輕，法律係想人重入正途，既然依家唔使坐，證明上天仍然照顧佢啦，真係恭喜晒！」