娛樂圈五光十色的背後，存在吸毒藝人已是公開秘密。Jill事件證明有集團供應毒品予藝人，不過據知過往賣家多以一手收錢一手交貨形式交易，現時賣買雙方為逃避警方和狗仔隊跟蹤，買家改以銀行入數過帳，賣家收錢後才將毒品速遞到買家手上，減低被捕風險。昨日，Jill在庭上承認採取毒品速遞方式，每星期過數給賣家，再從朋友手上收貨，消息透露，不少有毒癮的band友、奀星、紅星等亦是用這方式交收，以策安全。
孫耀威昨日出席活動時，大爆有電影導演將大麻當煙食：「相信有其他藝人掂過毒品，不過冇畀人拉。（戒唔到？）所以掂毒品好傻，拍電影見過導演日日大麻當煙食，鍾意發洩咪飲酒囉，飲酒合法嘛。」對於Jill被判緩刑，老孫說：「做錯事唔係世界末日，企番起身畀年輕人正能量。（公司未必畀機會？）希望唔好放棄佢，當事人亦唔好放棄自己。」
陳見飛：戥佢開心
至於幾位曾因吸毒被判罪的藝人，今日已改過自新，身為Jill朋友兼過來人的陳見飛說：「唔使坐監戥佢開心。（Jill承諾戒毒？）依家健康最重要。」對於Jill坦承08年4月開始接觸毒品，並從朋友身上得到，陳見飛煞有介事地說：「08年我搬咗去洛杉磯，識佢時佢冇掂（毒品），我哋得一個common friend，嗰個人都冇掂。（佢話工作壓力大？）佢有同我講擔心工作、事業，希望Jill願意返教會，神嘅支持救咗我同我屋企人，希望幫到佢。」
曾因藏搖頭丸接受勒戒的蘇永康，戥Jill家人安心：「唔知佢係咪想返娛樂圈，但要時間沉澱，法律唔係置諸死地，係希望有人改過，因為小弟都係咁，希望大家畀機會佢，亦唔好畀壓力衞蘭。」
對於Jill指衞蘭曾叫她戒毒，可惜卻戒不掉？蘇永康細想說：「呢樣要好小心講，當年我唔小心犯一個錯誤，但我冇毒癮，世上無難事，梁漢文都戒酒，事在人為。」
吳浩康：唔好放棄
重新做人的周永恒現從事作曲及幕後工作，他亦戥Jill開心：「喺日本咁耐好陰功，依家唔使坐監，要乖要珍惜，重新認識自己做過嘅錯事，錫爸爸多啲。呢段時間好難捱，要加油，我都用好長時間至原諒自己，相信Jill都會好自責，我會介紹耶穌畀佢識，因為都係耶穌畀力量我企番起身。」
曾藏可卡因的吳浩康則稱珍惜現有機會，又呼籲Jill不要灰心：「嚟緊條路仲難行，但唔好放棄，唔好辜負家人同錫佢嘅人期望，家人對佢嘅支持尤其重要。」
文：音樂組