陳奕迅曾因陳冠希言論而觸怒黃秋生，前晚二人出席首映竟老友鬼鬼又互送高帽。
陳奕迅（Eason）早前透露了好友陳冠希美國的生活狀況，結果令陳的契爺黃秋生不滿，隨即展開了一場隔空罵戰。前晚二人出席首映禮時，竟表現相當投契兼老友鬼鬼，秋生上台時更搭着Eason膊頭，台上又不時耳語，Eason更大賣口乖讚秋生演技出色，又安排中間位給他企以示尊重，十分識做。
口衰衰要慎言
事後Eason說：「我打過電話畀佢，佢話同傳媒講笑咋嘛，佢一向有黑色幽默，把口一向衰衰。我都係，不過我成日見記者要慎言啲。其實我好尊敬佢，片場都叫佢做師傅。」對於Eason指有意拜師學藝，秋生說：「佢畀面啫，我想跟佢學唱歌就真，香港唱得冇邊幾個。」
冇嫌棄謝天華
出爐影帝張家輝亦有到場支持，並大爆說：「我叫佢（秋生）嚟睇《証人》佢又唔嚟，今日我到場證明我唔記仇。」另外，秋生承認與謝天華合拍《Laughing哥前傳》，不曾嫌棄他，他說：「我做乜要嫌棄佢？（你輩分高？）咁我唔使拍戲啦！」
同場方力申談到將榮升金牌大風一哥，立即耍手擰頭否認。而劉洋和孟瑤性感到場，Eason在台上並肩而站不時與劉洋攀談，他說：「拍戲都見到晒，差唔多啦！女士們有身材都會驕傲，我冇乜嘢。」
文：影視組