於金像獎敗給徐嬌的張雨綺，大前晚獲因拍攝《跳出去》而傳緋聞的馮德倫「呵番」請食海鮮大餐，因女友徐若王宣不在旁，馮德倫跟張雨綺玩得甚為暢快，揀海鮮時打情罵俏，又為女方鬆骨，完全旁若無人。
今年入圍金像獎「最佳新演員」的張雨綺，最終敗給「同門」徐嬌之手，雖然如此，但一點也沒有影響她的心情，皆因她有緋聞男友馮德倫於金像獎翌日晚上請食海鮮大餐作補償，馮德倫更充當「柴可夫」接載她到西貢餐廳。
未知是否女友徐若瑄不在身旁，馮德倫與張雨綺毫無避忌，落車時並肩而行，在餐廳甫坐低，馮德倫便跟張雨綺一起揀海鮮，期間不時打情罵俏，揀龍蝦時因龍蝦突然跳躍，嚇得張雨綺花容失色，立即拉着馮德倫「擋駕」，可見兩人感情甚好。
食飽再鬆骨
揀完海鮮之後，馮德倫與張雨綺便返回座位，不停談天，張雨綺又拿出相機與馮德倫分享照片，當海鮮上桌後，兩人又不時互相夾餸給對方，全程更露出甜蜜蜜的笑容，十足一對熱戀情侶！當食飽飽之後，馮德倫埋單找數預備離開，經過張雨綺座位時，貪玩地鍊一鍊張雨綺膊頭，為她「鬆骨」，張雨綺亦十分受落，笑不攏嘴。
預祝攞影后
事後記者致電馮德倫，問他是否特別設宴「呵番」落選金像獎的張雨綺，他笑言：「佢唔使我安慰啦，《跳出去》會攞影后㗎嘛！其實，張雨綺之前叫我請佢食香港嘅海鮮，啱啱完成後期配音，咪請佢同工作人員食番餐慰勞，小雪都喺度㗎，其實，我哋最想監製周星馳睇完片覺得滿意嘅話，請我哋食海鮮就真！」
問馮德倫跟張雨綺食飯如此親密，不擔心女友徐若瑄會嬲嗎？他表示：「唔怕，大家都係朋友，徐若瑄嚟香港，我都會請佢食海鮮㗎。」
文：影視組