側田被指向索女「揩油」，側田的一眾好友都不值雜誌所指，紛紛力撐好友正直！身為王淑玲好友的「菠蘿」郭穎橋亦指老友並無不妥。
吳雨霏：
「我好信任阿田，我哋係好兄弟關係，知道佢絕對唔會咁做，一定係報道失實。佢份人好正直，對女仔好好，好尊重女性。（有冇見佢飲醉？）公司食飯成日飲吓嘢，但唔會癲，始終身為公眾人物，好小心言行舉止。」
小肥：
「吓，係咪㗎？唔排除有女仔博宣傳，亦唔排除個女仔表達錯誤，斷估側田唔會咁狼囉，都幾離譜，側田係一個好人，正常男仔，平時見到靚女大家會討論，呢啲好正常。（覺唔覺佢鹹濕？）唔覺，自己唔會問佢，但會笑佢，因為知道件事唔係真。」
「菠蘿」郭穎橋：
「上星期日同王淑玲食完飯，見佢冇乜嘢，有講有笑，遲啲會打電話慰問佢。（有冇遇過非禮？）搭港鐵試過有男人挨pat pat，唔知佢係咪有意，如果係真會即場鬧佢。」