被喻為新一代「溝女王」的側田，不甘被雜誌老屈在曾志偉生日派對上，公然向《美女廚房》的「美味天使」香蕉（王淑玲）抽水揸籮，昨日狂轟報道影響其人格及聲譽，揚言事件「太黑暗」涉及很多「內幕」，更暗示有人借其名氣博見報！
繼方力申被指狼溝美女廚神Rainbow後，同屬金牌大風的側田昨日亦盛傳在曾志偉生日派對上，借醉使出狼爪手「揸香蕉」，還意猶未盡趕下場連環
文頌嫻云云。被屈「揸蕉」的側田怒不可遏，昨午在金牌大風臨時召開記者會，激氣說：「我慣咗畀人咁寫，都唔係第一次，但今次報道全部都係假，而且好影響我人格、聲譽、屋企人同歌迷，所以我一定要出嚟講，唔可以再畀雜誌亂寫！」
去P強調冇醉
側田表示並不認識任何一位「美味天使」，又自爆已甚少夜蒲，並於去年尾開始戒煙戒酒，今次純粹是出席志偉派對，他稱當晚有喝酒亦感到high high哋，但強調沒有喝醉，問有沒有「飛來蜢」？他說：「我只係同幾個朋友玩啤牌！（識唔識『香蕉』？）唔識，我係上過個節目（《美女廚房》），但唔代表識，當晚亦唔知啲『天使』嚟咗！（有人借你宣傳？）唔知，太黑暗，有好多內幕嘢唔知！」
有指他狂文頌嫻期間，因被洪天明等人阻止而爆粗，側田昨日否認爆粗，問他是否過分熱情惹人誤會？側田說：「我一向都好熱情，所以依家影相都唔敢搭女仔膊頭，陣間又話係我女朋友！（使唔使同女友解釋？）我都冇女朋友。（緋聞女友曾雪華？）朋友啫！」側田所屬唱片公司金牌大風則表示會保留法律追究權利。
透過電視澄清
而香蕉昨晚接受《東張西望》訪問，問她有否被側田博懵？她說：「其實冇，裏面太黑，睇唔到有乜人，自己好攰冇乜mood玩，幾個天使一齊飲嘢食嘢。（見到側田會唔會尷尬？）唔會，呢件事唔係真，希望大家唔好誤會側田。」而文頌嫻（文女）透過經理人回覆，指接受雜誌電話訪問時，已澄清無此事發生，沒回答其他問題，可能是文字上的誤會。
採訪：音樂組