成龍的「自由論」引發軒然大波，前晚譚詠麟（阿倫）力挺好友，他指成龍有一顆愛國心，只是詞不達意才惹來誤會，慘被狠批到體無完膚，故代為求情說：「大家放佢一馬。」
阿倫前晚出席「環球節節領先白金盃賽事」，頒發「白金盃」給陳奕迅（Eason）、謝安琪（Kay）和張敬軒，恭賀三人新碟銷量破白金。由於阿倫和成龍老友鬼鬼，對於成龍一番「自由論」被萬箭穿心，阿倫力撐說：「講嘢都係藝術，本身佢人好急，用一兩分鐘邊講得清楚，大家都係中國人，都係愛國，佢唔係咁意思。」
台灣藝人幫口
有網友指要送成龍去北韓，阿倫說：「講笑嘅，大家唔好咁激。（網友罷買成龍和房祖名代言產品？）唔使咁，佢只係詞不達意，大家放佢一馬，佢都幫中國做好多嘢，每次佢少少錯誤，就搞到佢體無完膚，適當場合講適當嘢好難。」而查小欣昨日亦在節目中撐成龍：「成龍只係打星，唔係總統，乜佢講一句說話會令中港台冇晒自由？應該播番成龍成段說話。」
台灣藝人黃立成亦撐成龍，坦言：「台灣政治真的很亂。」而吳宗憲亦指成龍只是心直口快，只是有時亂放炮，請大家見諒。而中國外交部昨日舉行記者會，發言人姜瑜被外國傳媒問到成龍「自由論」時表示：「那是個人言論，我不對此進行評論。」
Eason有賺冇蝕
此外，Eason在台上搞笑指公司偏心Kay，事後他解釋只是講笑搞氣氛，Eason出道至今每張碟都賺錢，他得意洋洋說：「每逢離開一間公司，我都會問有冇令佢哋蝕錢？好彩咁耐都冇，仲有賺，自己個心好安樂，冇負過人嘛！呢個係自豪紀錄，但唔係驕傲。」
至於軒仔因過檔傳聞滿天飛，特別宣布新簽了環球為經理人之一，並加簽了25首歌，大讚公司的資源分配很好，並沒有厚此薄彼。
採訪：音樂組