從影近廿年的張家輝，繼香港電影評論學會後再次封帝，臨上台前家輝激動得緊擁太太關詠荷，並錫了老婆一啖才上台，他說：「由宣布候選名單到今日，心情好折磨，好在奧巴馬當選總統，令我覺得自己有機會，獎唔係屬於我一個人，係整個團隊，多謝英皇電影、楊受成先生，喺我演藝歷程中要多謝兩個人，杜琪峯令我獲益良多，介紹咗間抵食海鮮畀我，又介紹咗個風水先生我識；王晶往往喺我感到路途孤獨難行，就話『你返嚟啦，麻雀、牌九等緊你』，多謝佢好睇住我。」
無綫刪「多謝亞視」
家輝說到贏得影帝可能會有三年無工開的魔咒時，他說：「最佳演員一係好，一係做小販，若果我真係做小販，請大家都要記得第28屆香港電影金像獎最佳男主角係張家輝，多謝去世嘅家姐同我太太，佢照顧小朋友照顧得好好。」
同樣手執香港電影評論學會、金像獎兩個獎座的鮑姐，得知自己封后激動落淚，連帶坐在她身邊的爾冬陞、方中信及莫可欣等亦淚如雨下，鮑起靜在掌聲雷動下步上領獎台，她說：「多謝四位候選人，佢哋做得好好，不過敬老至頒獎畀我，多謝父母由細到大嘅培養，令我可以演戲做終身職業，多謝許鞍華，佢喺卡士、製作費都咁有限嘅情況下，滿腔熱誠去拍攝，多謝亞視同事嘅衷心祝福，多謝老公、乖女，令我人生充滿意思。」而無綫卻將吳君如、鮑起靜提到「亞洲電視」的片段刪走。
憑《天水圍的日與夜》一改天水圍悲情觀感的最佳導演許鞍華則說：「後生以為攞獎要去康城，年紀大至知喺自己人手中攞獎最高興，30年前電影圈係男性為中心，但我冇受到歧視，今日我攞獎，大家亦冇年齡歧視我，證明業界開明進步，我身為一分子亦覺驕傲。香港電影百周年，希望大家繼續努力。」
《葉問》最佳電影
《葉問》監製黃百鳴則率領台前幕後上台領取「最佳電影」獎項，他在台上安慰失落影帝的甄子丹，他說：「子丹或者會失望，但最佳電影即係包含咗所有最好嘅嘢！」
而相隔16年，繼《籠民》後再奪「最佳男配角」的廖啟智說：「我希望出年提名新人，我想心態要似新人，多謝上帝畀我演戲潛能，多謝太太、三個仔畀我輕鬆工作，多謝林超賢導演嘅溫馨提示，多謝張家輝、謝霆鋒嘅火，望一望你兩個對眼都㷫，多謝英皇電影、銀都機構。諾諾（廖已逝世的兒子），呢個獎你都有份。」
最佳女配角得主陳麗雲則慨嘆：「我喺呢行都做過好多工作，估唔到可以上台攞獎，多謝評審、《天水圍日與夜》台前幕後。」而當大會宣布陳麗雲得獎時，同片鮑起靜激動落淚。
「專業精神獎」得主、配音界老行尊丁羽被問獎項是否來得太遲，他說：「唔係，獲業界肯定、認同，唔少朋友恭喜我，晚晚慶祝，我好開心。」
文：影視組
《第28屆香港電影金像獎》得獎名單
最佳電影 《葉問》
最佳導演 許鞍華《天水圍的日與夜》
最佳編劇 呂筱華《天水圍的日與夜》
最佳男主角 張家輝《証人》
最佳女主角 鮑起靜《天水圍的日與夜》
最佳男配角 廖啓智《証人》
最佳女配角 陳麗雲《天水圍的日與夜》
最佳新演員 徐 嬌《長江7號》
最佳攝影 黃岳泰《畫皮》
最佳剪接 邱志偉《保持通話》
最佳美術指導 葉錦添《赤壁》
最佳服裝造型設計 葉錦添《赤壁》
最佳動作設計 洪金寶、梁小熊《葉問》
最佳音響效果 吳江、Roger Savage《赤壁》
最佳視覺效果 克萊格海斯《赤壁》
最佳原創電影音樂 岩代太郎《赤壁》
最佳原創電影歌曲 畫心《畫皮》
主唱：張靚穎、填詞：陳少琪、作曲：藤原育郎
新進導演 郭子健《青苔》
最佳亞洲電影 《集結號》
專業精神獎 丁羽
終身成就獎 蕭芳芳