緋聞男女方力申及鄧麗欣（Stephy）在節目《美女廚房》中，公然打情罵俏，小方更不避嫌處處偏幫及維護對方，難怪每位嘉賓都畀面Stephy，更封她做方太。
小方、鄭中基及梁漢文主持的無綫節目《美女廚房》前晚錄影，邀請Stephy、阮小儀、楊思琦任嘉賓，由森美、側田及周中做試味評判。期間緋聞男女小方及Stephy公然打情罵俏，小方更走到Stephy身旁協助煮餸，似足小夫妻。難怪鄭中基即叫Stephy做方太，而梁漢文就指小方不公平，只幫Stephy卻忽略小儀及思琦。
力撐好味
小方在試食評分時亦玩偏幫，Stephy炮製的咖喱雞，被一眾評判指淡而無味，側田更指雞不夠熟，但小方試食時就力撐無問題，更食得津津有味，表示可把其他人食剩的雞食完，冧到Stephy四萬咁口。
評分之際，小方出口術叫各兄弟留情，小方更給Stephy所煮的咖喱雞九點五分，雖然Stephy獲小方偏幫，但仍敗給小儀，皆因小儀誤打誤撞製出美味咖喱雞，將Stephy技術性擊倒。
小儀被嘲
事後Stephy對小方偏幫她一事，她甜絲絲說：「唔希望因為同公司而幫忙囉。（佢幫得好明顯？）哈，叫佢下一道菜唔好幫得咁出面。（有落開廚？）煮嘢都OK，不過我最驚係雞。」此外，小儀成森美嘲笑對象，森美指小儀不是美女，不明白她為何上《美女廚房》，又嘲小儀是灶君會攝灶罅，令小儀啼笑皆非。
文：影視組