歲月磨不了與子偶遇回憶

歲月磨滅了楊金套婆婆大部分記憶,然而,在其殘缺的香港回憶片段中,有一段卻清晰非常。「嗰時我帶個女去街市買餸,突然間聽到有人嗌媽媽,我望過去,原來係耀仔嗌我,但係拖住耀仔個女人係咁拖佢走,仲話呢個唔係你阿媽。」

心中刺難以釋懷

回憶起這段往事,楊婆婆不禁流淚:「我咁難先見番個仔,好想要番佢,所以追上去,但唔見咗人。之後我日日去街市等,但見唔番耀仔啦。」

「我發夢成日夢見佢……」楊婆婆說這生的遺憾,就是當時未有搶回耀仔,雖然現時兒孫滿堂,但是長子不在身旁始終是其心中的一條刺,「我咁就過咗大半世,希望有好心人可以幫吓阿婆啦。」

楊婆婆當年返回新會後不久就與黃華離婚,黃留在澳門,楊婆婆於當地改嫁再誕下兩名子女。子女成家後,目前自住一間數百呎大的三房村屋,平日只在睡房和天井活動,伴隨她的,除了簡單的煮食用具,還有一張神枱,每天,楊婆婆就在那裏祈求神明指引她尋子。

兩岸組記者廖怡德